Udaleku irekiak
Haur eta gazteek beraien udalerrietan gauzatzen dituzten eguneko udako egonaldiak antolatzen ditugu udalentzat. Aisialdiari lotuta, normalki goizez izaten dira, egun pasako egunen batzuekin uztartuz, eta hamabost egun edo hilabeteko iraupena izan ohi dute. Bertan parte hartzen duten haur eta gazteek 3 urtetik 12 urte bitarte izaten dituzte.
Hezten-en udalekuaren ildoa interesgune batek markatzen du eta, horren bidez, lortu nahi diren helburu orokorrak nahiz zehatzak lantzen dira: kideeen arteko harremanak, elkartasuna, elkarlana eta talde lana, gizarte trebetasunak… Interesgune hori adin tartearen arabera egokitzen dugu, baita haur eta gazteen interesen arabera, horien gozamenerako: ipuinak, koloreak, bidaiak, mundu fantastikoa, musika…
Haur eta gazteen jatorrizko udalerrian garatzen diren udalekuak izanik, balio erantsia ere badute. Izan ere, udalekuan zehar egiten diren jolas eta dinamikak herriko baliabideak erabiliz gauzatzen dira eta horrek, era berean, herriaren eta inguruaren ezagutzea eta honen balioaz jabetzea dakar.
Udaleku irekiak 2023
Hezten-en uda honetan ere ehunka haur eta gazteri aisialdi hezitzaile nahiz euskaltzaleaz gozatzeko aukera eskaini nahi diegu. Beraz, uda ahaztezina izan dadin, lanean ari gara!
Zuk ere esperientzia horren parte izan nahi baduzu hezitzaile moduan lan eginez, aukera izango duzu hautaketa prozesu batean parte hartzeko. Hori bai, udalekuetan lan egiteko hautatua izanez gero, udalekuak hasi aurreko formazio eta prestaketa egunetan parte hartzea ezinbesteko baldintza izango da.
