EKAITZA
Helburuak
Taldeak modu dibertigarri batean eratzea.
Parte hartzaileak
+12
Garapena
Lau txartel jarriko ditugu aretoan, puntu kardinal bakoitzeko bat: iparraldea, hegoaldea, ekialdea eta mendebaldea.
Orain istorio bat kontatuko diegula azalduko diegu parte hartzaileei, eta istorioan lau puntu kardinaletako bat aipatzen entzuten dutenean, korrika joan beharko dutela aipatutako puntura. “Ekaitza” hitza entzuten dutenean, berriz, edozein puntutara jo ahalko dute, baldintza batekin: puntu batean ezingo dira hiru pertsona baino gehiago bildu (kopuru hori partaide kopuruaren araberakoa izango da, baina guztiek izen behar du tokia puntu batean edo bestean).
Istorioa (aldez aurretik prestatuta edo bat-batean asmatua) kontatzen hasiko gara, tarteka puntu kardinalen izenak eta “ekaitza” hitza esanez.
“Ekaitza” hitza esaten dugun aldietako batean, amaitutzat emango dugu istorioa, eta parte hartzaileak une horretan banatuta dauden moduaren arabera (lau multzotan banatuta egongo dira) osatuko ditugu taldeak. Iparraldean daudenek talde bat osatuko dute, hegoaldean daudenek beste bat, eta ekialdeko eta mendebaldekoek beste talde bana.
Antolaketa
Txartelak prest eta ondoan eduki, jarduera hastean. Istorioak asmatzen oso trebeak ez bagara, hobe izango dugu aldez aurretik prestatuta edukitzea bat.
Jolas eremua
Edozein.
Denbora
15 minutu.
Materiala
Puntu kardinal bana idatzita duten txartelak.
Aldaerak
Istorio desberdina kontatu aldiro.
Puntu kardinalen ordez, beste espazio batzuk hauta eta aipa daitezke istorioa kontatu ahala.
Gomendioak
Aldez aurretik erabaki nolako taldeak osatu nahi ditugun, elkarrentzat oztopo izan daitezkeen pertsonak elkarrengandik bananduz eta elkarren lagungarri izan daitezkeenak elkartuz.
Ebaluazioa
Taldeek kide kopuru orekatua duten ikusi.
